[美食攻略]
最近米芝蓮餐廳又揭盅，一班熱愛飲食既朋友又要出動搵食喇！行過深水埗，見到有間泰國餐廳表示自己已經連續5年成為米芝蓮餐廳，咪試下佢囉！
老實講環境就真係麻麻地，都幾迫，不過係深水埗，仲要咁既價錢，仲可以要求啲咩呢？好多餐廳都有海南雞飯，不過質素都可以幾參差，不過呢間既都唔錯既，雞肉幾嫩滑，個飯底都幾香，不過我就真心覺得灣仔間泰妃雞係好食小小既。
再黎一個滷水鴨飯，個賣相真係不得了！但係食落又唔錯喎！鴨肉好入味，雖然滷水味偏向咸，但又唔會太濃烈！仲要跟埋鴨腎，都係煮得好入味！所以幾時都話人不可貌相咖啦！
至於個冬陰公湯河，值得一讚既係佢酸多過辣，香得黎又唔會俾辣味搶走哂啲味！不過食完會幾口乾，怕辣既就要諗諗喇！
炭燒豬頸肉都係值得推介！肉質好爽 (雖然要搵肉質唔爽既豬頸肉都真係幾難既)，不過配既汁好好味，酸酸地，好正咖！
每個飯餐大約為HKD$55，全日都同價，咁既價錢又真係食得過喎！
泰潮
深水埗福榮街101號地舖
Search